Віргілія і ліпа-патрыярх. Як выглядаюць экасцежкі ў Высокім Камянецкага раёну

У невялічкім горадзе Высокае, што нават не райцэнтр, праходзіць адразу тры зялёныя маршруты. Ці прыдатныя яны для карыстання?

На тэрыторыі Беларусі – амаль 700 экасцежак. Як і варта чакаць з азначэння “экалагічная сцежка – гэта адмыслова абсталяваны маршрут для правядзення эколага-асветніцкіх і пазнавальных мерапрыемстваў”, больш за 600 з іх дзейнічае пры ўстановах адукацыі.

Яшчэ 70 – у лясгасах, на тэрыторыях з асаблівай аховай. Сталіца ганарыцца васмю экасцежкамі. Праўда, не ўсе яны ў аднолькава добрым стане. Некаторыя адманіторыў наш журналіст Аляксандр Лібертад.

А як гэта ўсё працуе ў глыбінцы? Лепшая там сітуацыя ці горшая? У траўні мы гулялі пра экасцежцы ў дендрасадзе ля Глыбокага, і яна была амаль ідэальна дагледжаная.

У жніўні наведалі парк горада Высокае ў Камянецкім раёне. Праз яго праходзіць адразу тры экалагічныя сцежкі: звыклая пешаходная, роварная і водная. Як яны выглядаюць?

Пачнем з таго, што Высокае знаходзіцца блізка ад мяжы з Польшчай і ўпарадкаванне экасцежак было зроблена за грошы праектаў транспамежнага супрацоўніцтва. Потым, Высокае – усё ж не эка-Мекка, калі сюды едуць турысты, то ў першую чаргу іх вабіць гісторыка-культурная, а не прыродная спадчына. Пад назвай Высокі горад згадваецца ў XIV стагоддзі ў сувязі з візітам Гедыміна.

У 1494 у ліку першых беларускіх гарадоў Высокае атрымала Магдэбургскае права. Для населенага пункта, што нават не з’яўляецца райцэнтрам (хаця мела такі статус у 1940 – 1962 гг) мае надзвычай шмат помнікаў архітэктуры. Тут можна паглядзець Траецкі касцёл, капліцу святой Барбары і прыдарожную каплічку, царкву 1869 года пабудовы з характэрнымі агароджай і цокалем з мясцовага камення, старую плябанію, руіны сінагог, будынак кляштара баніфратараў, старыя каталіцкія могілкі, шараговую забудову.

Віргілія

Парк, па якім ідуць экасцежкі, атачае палац Патоцкіх і змяшчае руіны замка Сапегаў, аранжарэю, старыя гаспадарчыя пабудовы. Гуляюць тут і мясцовыя, і турысты. Унутры замкавых валоў абсталяваны стадыён. Парк і вадаёмы закладзеныя яшчэ ў канцы XVII стагоддзя.

 Сёння тут праходзяць зялёны водны маршрут “У Палессе па Пульве” (рака, на якой стаіць Высокае), зялёны роварны маршрут “З Палесся ў Прадпалессе” і экалагічная сцежка “Па Высокаўскім парку”.

На апошняй можна пабачыць пірамідальны дуб, віргілію, рэйнутрыю, “ліпу-патрыярх”. Ад апошняй, праўда, застаўся толькі пянёк. Файна, што сцежка ўлучае і прыродныя, і архітэктурныя аб’екты.

Палац Патоцкіх

 

Комплексны праект падтрымкі турыстычнага сектару польска-беларускага памежжа, у межах якога створаны ўсе экасцежкі, рэалізаваны ў 2007 – 2013 гг. Стэнды пашкоджаныя менш, чым можна было б чакаць, аб’екты збольшага на месцы (акрамя ліпы-патрыярха), асаблівага засмечвання не заўважана.

Сажалка

Водная сістэма зарасла раскай, сажалкі і каналы добра было б пачысціць. Магчыма, буянне расліннасці тлумачыцца спякотным летам. Палац Патоцкіх знаходзіцца на рэстаўрацыі, абнесены плотам, таму, магчыма, пагрозу экасцежкам можа ствараць будаўнічая тэхніка, але пакуль што быццам бы ўсё добра. Рэстаўрацыі патрабуюць і гаспадарчыя будынкі, і аранжарэя, але пакуль што да іх чарга не дайшла.

Роварны і водны зялёныя маршруты злучаюць Высокае з навакольнымі вёскамі. Ужо па невялічкім куточку бачна, што Камянецкі раён мае вялікі турыстычны патэнцыял. У самім Камянцы былі заўважаныя нават японскія турысты. Натоўпамі яны, аднак, не ходзяць. Будзем спадзявацца, што справа толькі за якасным мэнэджмэнтам.

Пірамідальны дуб

Брама замку Сапегаў

Руіны Аранжарэі


ІНШЫЯ НАВІНЫ РУБРЫКІ

Падзяліцца: 03.09.2018

Перадрук матэрыялаў магчымы пры абавязковай наяўнасці зваротнай і актыўнай гіперспасылкі.